كتير بنلاقى كده

مش عارفه اتكلم فى ايه لان فيه مواضيع كتير جدا فى دماغى لدرجة ان اعصابى بدأت تتعب 

قلق قلق قلق من كل حاجه حواليا يعنى من عريسى يا ترى هيبقى فعلا كويس بعد الجواز و على قد المسئوليه اذا كان ساب الشغل قبل خطوبتنا و بدأ يقعد فى البيت و يقولى متشغليش بالك من اى حاجه 

انا عارفه انى حبيته بس ساعات بحس ان مش فى دماغه او حتى انه مش عايز يشاركنى افكاره و احلامه او يشاركنى همومه 

امال هيشاركنى ايه بقى ده اللى انا مستغرباله و تاعبنى جدا

لدرجة انى بقيت عصبيه جدا و خسرت ناس كتير جدا من اللى حواليا بسأل نفسى كتير ليه و عشان ايه 

اهم حاجه ان اعز صديقه ليا مش حاسه بيا و بالنسبالها انا نكديه او بازود الامور و انى المفروض ابقى مستقره عاطفيا عشان اتخطبت فالمفروض انى ابقى سعيده و مبسوطه و طايره من الفرحه مش زعلانه و لا عصبيه 

ساعات بحس انى فعلا مزوداها بس ده مش بمزاجى عشان انا حساسه و اى حاجه صغيره بتأثر فيا لو كلمه او اهتمام بسيط بالاقى نفسى مبسوطه و بانسى العالم باللى حواليه و لو حاجه صغيره اوى اد كده ممكن تنرفزنى و تخلينى مانامش من التفكير 

على الاقل كنت فاكره ان فى ناس فاهمنى و حاسين بيا مش بس موجودين عشان ينتقدونى مع ان المفروض انهم يقفوا جنبى بس فعلا مفيش حد بيشيل هم حد و لا بيتعب عشان حد 

انت بس اللى بتحس باللى جواك انت بس اللى ممكن تحس بنفسك بالمك بتعبك بقلقك و ممكن تقف جنب نفسك لان محدش هيقف جنبك الا اذا كان عايزك مصلحه طريق يمشيه معاك او واحده تسمعها و تدى رأيها فى حكاويها لاء و لازم يبقى رأى على مزاجها عشان لو مش على مزاجها يبقى انتى بتكرهيها او مش بتحترميها او انانيه مبتحبيش غير نفسك 

سبحان الله مع ان قلبى بيكون على مصلحتها و خايفه عليها بس من كتر ما الواحده بتنافق غيرها او بتصادق بس بالكلام الحلو اللى طبعا مش حقيقى او الخوف و اللهفه اللى طبعا تمثيل و يتقلبوا شتايم اول ما التانيه تديها ضهرها فمش عادت بتصدق ان انتى بجد بتخافى عليها او ان انتى بجد مش غرضك حاجه عشان تنصحك او ان صوتى العالى لما الاقيها غلطت خوف عليها زى ما الاب بيزعق لابنه لما يغلط مش بيزعقله عشان بيحب يزعق يعنى لاء بيزعقله عشان عايزه يبقى احسن واحد فى الدنيا و مايغلطش عشان محدش يقدر يغلطه و يبقى راجل عارف الصح من الغلط يعنى حب فيه مش كره لسمح الله و لا اثبات للنفس على ابنه

لو الناس تفهم المشاعر الصادقه من المشاعر الزايفه مكنش حد صاحب حد صح

بس يا خساره الناس بقت كلها زايفه كدبه كبيره لدرجه انهم صدقوا انهم صح